МАЕСТРАЛНО ЛОКАЛНО ВОДСТВО: Угостителите се повлекуваат, плоштадот останува на граѓаните

Струмица, 27 мај – Магичното политичко танго на градоначалникот Костадин Костадинов вроди со плод. По интензивни разговори и конструктивен пристап, сите угостители прифатија доброволно да ги отстранат недоследностите констатирани од страна на општинските инспектори и сами да го ослободат плоштадот, оставајќи го повторно на располагање на струмичани.

Во духот на дијалог и со почит кон интересите на сите страни, Костадинов успеа да го постигне она што многумина го сметаа за невозможно – балансирање помеѓу заштитата на јавниот интерес и почитувањето на приватниот бизнис.

Во своето обраќање, градоначалникот ја нагласи потребата од системско решавање на проблемот со урбаната опрема. Според него, носењето на нов правилник без претходни законски измени може да донесе дополнителни проблеми за угостителите, наместо решенија.

Токму затоа, тој најави дека ќе биде првиот потписник на иницијатива за измена на Законот за градење, која ќе обезбеди јасни и правично применливи правила за сите.

„Правилата мора да се темелат на закон, а не на моментални толкувања. Само така ќе имаме одржлив систем кој ги штити и правата на граѓаните и интересите на деловната заедница“, истакна Костадинов.

Овој исход е пример за умешно водење локална политика, базирана на комуникација, разбирање и визија. Одлуката на угостителите да постапат во согласност со забелешките, и подготвеноста на градоначалникот да иницира законски измени, претставува модел кој може да послужи и на национално ниво.

Граѓаните го добиваат назад својот плоштад – јавен простор што треба да служи за слободно движење, културни настани и дружење.

Угостителите, пак, добиваат партнер во локалната власт, кој не владее со сила, туку со дијалог и разбирање.

Ова е победа за сите – и за демократијата, и за урбаниот развој, и за граѓанската свест. Браво, Струмица!