Косово ќе прими до 50 мигранти од САД во рок од една година

Владата на Косово денеска донесе одлука да прифати до 50 мигранти од Соединетите Американски Држави во период од една година.

Како што пренесува Коха, мигрантите ќе престојуваат во Косово со цел да им се овозможи безбедно враќање во нивната матична земја.

„Косовската влада одобри одлука за обезбедување привремена и непосредна заштита за 50 лица, во рамките на соработката со САД. За време на нивниот престој, тие ќе се придржуваат кон важечките законски прописи на Република Косово и ќе ги уживаат правата предвидени со нив“, се вели во соопштението.

Премиерот Албин Курти објасни дека лицата ќе бидат избрани од „предложен список“ и додаде дека ќе живеат во Косово во согласност со домашното законодавство.

„Соединетите Американски Држави остануваат наш верен сојузник, а Косово ќе биде нивен сигурен партнер. Длабоко сме благодарни за нивната постојана поддршка, особено во областа на безбедноста, развојот и нашите евроатлантски аспирации“, напиша Курти на Фејсбук.