Доларот зајакнува, цените на нафтата растат по израелскиот напад врз Иран

Финансиските пазари реагираа бурно по веста за израелскиот напад врз Иран, со зголемена побарувачка за побезбедни средства и нагло зголемување на цените на нафтата.

Азиско-пацифичкиот индекс MSCI утрово, околу 7:00 часот, забележа пад од 0,8 проценти, а берзанските индекси во Австралија, Шангај, Хонг Конг, Јапонија и Јужна Кореја се намалија меѓу 0,4 и 1,4 проценти.

Инвеститорите се повлекуваат од поризични средства поради растечките геополитички тензии, откако Израел рано утрово изврши напад врз Иран, кој, пак, најави остар одговор.

Како резултат, американските фјучерси Dow Jones, S&P 500 и Nasdaq паднаа за повеќе од 1 процент, што укажува на можна негативна сесија на Волстрит. Паневропскиот фјучерс индекс STOXX 50 исто така бележи пад од над 1,5 проценти, што најавува притисок и врз европските берзи.

Геополитичките тензии дополнително ја засилија неизвесноста на финансиските пазари, кои веќе се под влијание на глобалната економска нестабилност и агресивните трговски политики на американската администрација.

„Геополитичките ризици го зголемија ионака кревкото инвестициско расположение,“ изјави Чару Чанана, стратег во Saxo Bank.

Индексот MSCI на глобалните берзи неодамна достигна рекордно високо ниво, што некои аналитичари го сметаат за преценето, особено во услови на зголемени ризици и глобални конфликти.

„Сегашната ескалација би можела да биде катализатор за очекуваната корекција на берзите,“ истакна Џесика Амир, стратег во MooMoo.

На валутните пазари, американскиот долар зајакна во однос на поголемиот дел од најтргуваните валути. Индексот на доларот, кој ја мери вредноста на американската валута во однос на шест главни валути, се зголеми за 0,4 проценти, достигнувајќи 98,07 поени. Во однос на еврото, доларот зајакна за 0,3 проценти, со што европската валута падна на 1,1550 долари.

Сепак, доларот забележа слабеење од околу 0,4 проценти во однос на јапонскиот јен и швајцарскиот франк – валути кои традиционално се сметаат за сигурни засолништа во време на глобална неизвесност.

Цените на нафтата забележаа нагло зголемување, со оглед на загриженоста дека ескалацијата на конфликтот може да го загрози снабдувањето од Блискиот Исток. На лондонскиот пазар, цената на барел нафта порасна за 9,8 проценти, достигнувајќи 76,20 долари, додека на американскиот пазар цената скокна за 10,44 проценти – на 75,15 долари по барел.