Естонија со најсиромашни пензионери, Исланд на врвот по животен стандард во староста

Пензионерите во Источна Европа се соочуваат со најголеми финансиски предизвици, додека најниски стапки на сиромаштија меѓу пензионерите се забележуваат во скандинавските и некои западноевропски држави. Според најновиот извештај на Организацијата за економска соработка и развој (ОЕЦД), објавен од „Euronews“, највисока сиромаштија кај пензионерите е регистрирана во Естонија (37,4%), а најниска во Исланд (3,1%).

Во поголемиот дел од Европа, просечниот приход на лицата постари од 65 години е под 80% од националниот просек, што придонесува за поизразена сиромаштија кај оваа категорија.

Балтичките држави – Естонија, Латвија и Литванија – како и дел од посткомунистичките земји, бележат највисоки стапки на сиромаштија кај пензионерите. По Естонија, Латвија има стапка од 33%, Хрватска 28,5%, а Литванија 24,6%.

Наспроти тоа, скандинавските земји како Норвешка (4,1%), Данска (4,3%) и Финска (5,5%) се меѓу државите со најниски стапки, благодарение на силните социјални системи и универзални пензиски програми.

Изненадувачки, високи стапки на сиромаштија се забележуваат и во Швајцарија (19,8%) и Обединетото Кралство (14,9%), иако се сметаат за развиени и економски стабилни држави.

Од петте најголеми европски економии, Велика Британија има најголем удел на сиромашни пензионери, а веднаш зад неа се Германија (14,1%) и Шпанија (13,1%). Франција има најниска стапка од само 6%, што се припишува на поизразениот систем на социјална заштита.

ОЕЦД укажува дека клучен фактор за ваквата состојба се ниските пензии поврзани со заработката, како и недоволните социјални бенефиции во некои земји. Експертот Ендру Рајли нагласува дека државите со силен прв столб – државни пензии – имаат пониски стапки на сиромаштија.

Во однос на односот меѓу приходот на постарите лица и националниот просек, најлоша е ситуацијата во Естонија (66,3%), а најдобра во Луксембург, каде лицата над 65 години добиваат дури 107% од просечниот приход во земјата.

Извештајот напомнува дека покрај приходите, важна е и куповната моќ, која варира од земја до земја и зависи од трошоците за живот, сопственост на имот и други фактори кои влијаат врз реалниот животен стандард на пензионерите.